خۆشەویستی یەکلایەنە:
خۆشەویستی یەکلایەنە ئاماژەیە بۆ هەستێک کە مرۆڤ وەسوەسەیەکی بەدی نەهاتووی هەیە و ناتوانێت خۆشەویستییەکەی لەگەڵ خۆشەویستەکەیدا دابەش بکات. ئەم خۆشەویستییە بە گشتی بابەتێکی دەروونییە و عاشق لە مێشکیدا خەون بە خۆشەویستەکەیەوە دەبینێت و وەک خۆشەویستەکەی خەیاڵی دەکات.
عاشق لە ڕووی نەخۆشیەوە وابەستەی خۆشەویست دەبێت و ئامادەیە لە هەر دەرگایەک بدات بۆ ئەوەی لایەنی بەرامبەر حەزی لێبکات. بە خەیاڵکردنی ئەوەی کە دەتوانێت لە داهاتوودا خۆشەویستی هاوبەشەکەی بەدەستبهێنێت، دەست دەکات بە سەلماندنی ئەم هەستە لە مێشکیدا. بێگومان بەپێی جۆری ئەو دۆخەی مرۆڤ تێیدایە، خۆشەویستی یەکلایەنە دەتوانێت جۆری جیاوازیشی هەبێت.
هەندێک جار ئەگەری ئەوە هەیە ئەو کەسەی عاشقیت بەهیچ شێوەیەک لە خۆشەویستی تۆ بە خۆی، نەزانێت و ئەم نەزانینە هۆکاری بێ بایەخی ئەو بێت بەرامبەرت و هەندێکجاریش لایەنی بەرامبەر ئاگاداره له وەسوەسەی تۆ و ئەو خۆشەویستییەی کە تۆ بۆ ئەوت هەیە . بەڵام نایەوێت پەیوەندیت لەگەڵدا بکات.
نیشانەکانی خۆشەویستی یەکلایەنە:
سەرەتا پێویستە بزانیت ئایا ئەوەی هەستی پێدەکەیت بەڕاستی خۆشەویستی یەکلایەنەیە یان نا. بۆ ناسینی ئەم کێشەیە پێویستە گرنگی بە نیشانەکان بدەیت. ئەو نیشانانەی کە پێت دەڵێن هەست بە چی دەکەیت، خۆشەویستی ڕاستەقینە نییە و بۆ پەیوەندییەکی تەندروست و سۆزداریت ڕێکناخات.
لەم بابەتەدا لە سایتی بۆزانینەوە نیشانەکانی خۆشەویستی یەکلایەنەتان پێ ئاشنا دەکەین. ئەگەر ئەم نیشانانەت هەبوو نیگەران مەبە، بە خوێندنەوەی بابەتەکانی بەشی پەیوەندی سۆزداری و هاوسەرگیری لە سایتەکەدا، دەتوانیت هێواش هێواش لە پەیوەندییە دروستەکە تێبگەیت و دواجار خۆشەویستییەکی جوانت هەبێت.
1. له خۆشەویستی یەکلایەنە دا، تۆ دەستپێشخەری هەموو گفتوگۆ و پەیوەندییەک دەکەیت
ڕاستە نامە ناردن یان پەیوەندیکردن بە نۆرە نابێت، بەڵام کاتێک هەمیشە دەستپێشخەر بیت ئەوە پەیوەندییەکی دروست نییە. لە پەیوەندییەکی دینامیکیدا هەردوو لایەن چاویان لە یەکترە و وزە بە یەکتر دەبەخشن و هەموو بەرپرسیارێتییە سۆزدارییەکان ناکەونە سەر یەک کەس.
2. له خۆشەویستی یەکلایەنە دا، تەنها تۆ حەزت لێیە دەست لە دەستی بەرامبەرەکە بدەیت
کاتێک 2 کەس یەکتریان خۆشدەوێت، دەیانەوێت دەستی یەکتر بگرن، یەکتر لە باوەش بگرن، یان پێکەوە دابنیشن. بەپێچەوانەوە کاتێک کەسێک ئەويتری بەدڵ نییە، هەر بەرکەوتنێک ئازاری دەدات و هەوڵی دوورکەوتنەوە دەدات. بۆیە ئەگەر ئەوی دیکەی بەرچاوت هیچ ئارەزووی ئەوەی نەبوو دەستەکانت بگرێت یان لە باوەشت بگرێت، یان هەرکاتێک ئەوەت کرد دووری بخاتەوە، پێویستە گومانت هەبێت کە خۆشەویستیت یەکلایەنەیە.
3. له خۆشەویستی یەکلایەنە دا، تۆ پێت وایە خۆشەویستەکەت کامڵترین کەسە لە جیهاندا و هیچ کەموکوڕییەکی نییە
لە پەیوەندی سۆزداریدا هەردوولا خاڵی لاوازی یەکتر دەبینن، بەڵام سەرەڕای ئەو خاڵە لاوازانە یەکتریان خۆشدەوێت. بە واتایەکی تر یەکتری وەک تەواو نابینن و ناتەواوی لایەنی بەرامبەریان قبوڵ دەکەن. بەڵام لە خۆشەویستی یەکلایەنەدا، خۆشەویست خۆشەویستەکەی وەک مرۆڤێکی تەواو و بێ کەموکوڕی دەبینێت.
ئەو کەسانەی تێوەگلاون لە خۆشەویستی یەکلایەنەدا وێنەیەکی ئەفسانەیی کەسی بەرامبەر لە مێشکیاندا دروست دەکەن و عاشقی دەبن. بۆیە کاتێک تێدەگەن کە عاشقی ڕاستەقینە جیاوازە لەو وێنەیەی لە مێشکیاندا دروستیان کردووە و مرۆڤێکی ئاساییە، ئازاریان پێدەگات.
4. له خۆشەویستی یەکلایەنە دا، لایەنی بەرامبەر هیچ کاتێک بۆ ناسینی تۆ بەسەر نابات
بۆ ئەوەی پەیوەندییەک دروست ببێت، دەبێت هەردوولا بەشێوەیەکی پێویست یەکتر بناسن و لێک تێبگەن. بە تێپەڕبوونی کات ئەزموونی هاوبەش دروست دەکەن و پرسیار لە یەکتر دەکەن و هەوڵ دەدەن بە شێوازی جیاواز لە هاوبەشی سۆزداری خۆیان تێبگەن.
لە خۆشەویستی یەکلایەنەدا تەنها یەک کەس ئەو کارە دەکات. پرسیار لە لایەنی بەرامبەر دەکات، هەوڵ دەدات ئەزموونی هاوبەش لەگەڵیدا دروست بکات بۆ ئەوەی زیاتر بناسێت و هەوڵی دروستکردنی پەیوەندی دەدات. بەڵام کەسی بەرامبەر یان خۆی لە وەڵامدانەوە دەپارێزێت یان تەنها باسی خۆی دەکات و گرنگی بە ناسینی کەسی بەرامبەر نادات. ئەمەش مانای ئەوەیە کە بەنیازی ئەوە نییە پەیوەندییەکی جددی دروست بکات و تەنها قسە لەگەڵ کەسێک دەکات بۆ تێپەڕاندنی کاتەکە.
بۆچی یەکلایەنە عاشق دەبین؟
کاتێک تێدەگەیت خۆشەویستی یەکلایەنە چەندە بە ئازارە، پرسیار دەکەیت بۆچی چوویتە ناو ئەم هەستەوە. بەڵام هەندێک هەست لە ژێر کۆنترۆڵی ئێمەدا نین و پێش ئەوەی ئاگاداریان بین ئێمە تێوەگلاون.
هەندێک لەو هۆکارانەی کە مرۆڤەکان تووشی ئەو جۆرە خۆشەویستییە دەبن بریتین لە:
- تۆ وا خەیاڵ دەکەیت کە هاوبەشی ژیانت کەسێکی ئایدیاڵە و ئەو وێنەیە دەروونییەی کە بۆی دروستت کردووە حەزت لێیە.
- لای تۆ خۆشەویستی یەکلایەنە پەیوەندییەکی ساختەیە، وە تۆ لە پەیوەندییەکدایت بەبێ ئەوەی لەگەڵ کەسدا کارلێک بکەیت و ڕەنگە ئەمە بێت کە سەرنجت ڕابکێشێت.
- بۆ ئەوەی لە پەیوەندییەکی ڕاستەقینەدا بیت، دەبێت لاواز بیت و ڕێگە بە کەسی بەرامبەر بدەیت بچێتە ناو بەشە جیاوازەکانی ژیانتەوە. ڕەنگە ئەمە بۆ تۆ ترسناک بێت و تۆ پێت باشە لە نیمچە خۆشەویستیەکی یەکلایەنەدا بمێنیتەوە کە پێویستی بە مەترسی و لاوازی و پابەندبوون نەبێت.
- لەوانەیە تۆ کەسێک بیت کە بە سروشتی پەیوەندییە زەحمەتکێشەکان بە سەرنجڕاکێشتر بزانیت، خۆشەویستی یەکلایەنەی ئەفسانەیی بە باشتر دەزانیت لە پەیوەندییەکی تەندروست بەڵام ئاسایی.
- ڕەنگە کەسی بەرامبەرت هاوڕێیەکی دێرین بێت کە چەندین ئارەزوو و خولیای لەگەڵدا هەیە. هەر بۆیە پێت وایە دەتوانێت هاوبەشی سۆزداریت بێت.
زیانەکانی خۆشەویستی یەکلایەنە:
ڕەنگە بتوانیت بیهێنیتە بەرچاوت کە ئەم هەستە وێرانکەرانە چەندە دەتوانن ئازارت بدەن. خۆشەویستی بێ بەرامبەر سەرچاوەی فشار و گێژاوی سۆزدارییە کە جگە لە هەستەکانت کاریگەری لەسەر هەموو لایەنەکانی ژیانت دەبێت. کاریگەرییە تێکدەرەکانی ئەم جۆرە پەیوەندییە بریتین لە:
- کەمبوونەوەی خۆبەگەورەزانین؛
- هەستکردن بە ڕەتکردنەوە؛
- هەستکردن بە ناشایستەیی بۆ خۆشەویستی یەکتر و وەرگرتنی سۆز لە لایەنی بەرامبەرەوە؛
- هەستکردن بە تەنیایی لە ڕادەبەدەر؛
- دوورکەوتنەوە لە کەسانی تر و گۆشەگیری؛
- قبوڵ نەکردنی پەیوەندی نوێ تەنانەت کاتێک کەسێکی تەندروست و عەقڵ داوای ناسینت و دەستپێکردنی پەیوەندی سۆزداری لەگەڵت دەکات؛
- زیادبوونی بەرچاوی فشار.
زۆر تێوەگلانی لەگەڵ خۆشەویستی یەکلایەنە دەبێتە هۆی خەمۆکی. بێگومان بۆ هەندێک کەس خۆشەویستی یەکلایەنە وەرچەرخانێکە و چانسی گەشەکردنیان پێدەبەخشێت. ئەم کەسانە بە تێوەگلان لەم پەیوەندیانەدا باشتر خۆیان دەناسن، تێدەگەن چییان لە پەیوەندییەکی سۆزداریدا دەوێت و چ جۆرە کەسێک بۆیان گونجاوە. ئەم زانیاریانە یارمەتیان دەدات لە داهاتوودا هاوبەشی سۆزداری دڵخوازی خۆیان بدۆزنەوە و پەیوەندییەکی تەندروست و بەرهەمداریان هەبێت.
ڕێگاکانی جێهێشتنی خۆشەویستی یەکلایەنە:
جێهێشتنی خۆشەویستی یەکلایەنە بۆ زۆر کەس مەحاڵە. ئەوان پێیان باشترە لە سترێس و ئەشکەنجەی ئەم خۆشەویستی یەکلایەنە و فەرامۆشکردنی لایەنی بەرامبەردا بمێننەوە، بەڵام شکستی خۆشەویستی ئەزموون ناکەن! هەرچەندە پێت وایە مەحاڵە ڕزگارت بێت لە خۆشەویستی یەکلایەنە و شکستی خۆشەویستی لەناوت دەبات، بەڵام پێویستە کات بەخۆت بدەیت و هێواش هێواش خۆت لەم پەیوەندییە ئازاد بکەیت.
لێرەدا چەند پێشنیارێک دەخەینەڕوو بۆ ڕزگاربوون لە خۆشەویستی یەکلایەنە، کە ڕەنگە لە ڕۆژانی یەکەمدا جێبەجێکردنی قورس بێت، بەڵام بە تێپەڕبوونی کات، یارمەتیت دەدات لەم پەیوەندییە ساختە ژەهراوییە دەربچیت و زەردەخەنە بکەیت بۆ دەرفەتە نوێیەکانی ژیانت.
- ڕێگە بە خۆت بدە خەمبار بیت و فرمێسک بڕێژیت بۆ ماتەمینی لەدەستدانی خۆشەویستیت.
- کاتێکی پێویست بۆ خۆت تەرخان بکە، داوای ڕاوێژکاری بکە، دڵنیابە لە چاککردنەوەی ئەو زیانانەی کە بەهۆی خۆشەویستی یەکلایەنەوە تووشی بووی. ئەم برینە ناوەکیانە کاتیان دەوێت تا چاک دەبنەوە، بۆیە کاتێک بۆ چاکبوونەوە تەرخان بکە.
- خۆت سەرقاڵ بکە بە شتە بەسوودەکان و خولیاکان کە حەزت لێیە بۆ ئەوەی خۆت نەخەیتە ناو ڕومانەکردنی دەروونییەوە.
- شێوازی بیرکردنەوەت بزانە. هەندێک کەس بەهۆی شێوازی بیرکردنەوەی کۆنیانەوە مەیلیان بەرەو پەیوەندی ژەهراوی و خۆشەویستی یەکلایەنە هەیە. ئەم نەخشانە لە منداڵییەوە دروست دەبن و لەوانەیە کاریگەرییان لەسەر ژیانی گەورەیی کەسێک هەبێت. کەواتە بە هاوکاری پزیشکی دەروونناس ئەم نەخشانە بدۆزەرەوە و بیانشکێنە بۆ ئەوەی خۆت ئامادە بکەیت بۆ چوونە ناو پەیوەندییەکی تەندروست.
- سەرنجت لەسەر خۆت بێت. لیستی ئەو کارانە بنووسە کە دەتەوێت بیکەیت و ئەنجامی بدەیت. ئامانج و پلانەکانت بخەرە سەر کاغەز و دەست بکە بە هەوڵدان بۆ بەدیهێنانی. وەبەرهێنان لە خۆت بکە، گەشە بکە و خۆت خۆش بوێت.
ئایا پێویستمان بە پسپۆڕێکی دەروونناس هەیە بۆ ئەوەی ڕزگارمان بێت لە خۆشەویستی یەکلایەنە؟
ئەوە لەسەر تۆ ماوەتەوە، ئەوە بەدەست تۆیە. هەندێک کەس دەتوانن هەست و بیرکردنەوەکانیان بەڕێوەببەن و لەم پەیوەندییە ساختە ژەهراوییە ڕزگاریان بێت. بەڵام ئەوانی تر پێویستیان بە هاوکاری کەسانی شارەزا هەیە بۆ ئەوەی لە خۆشەویستی یەکلایەنە ڕزگاریان بێت. ئەگەر ئەم نیشانانەی خوارەوەت هەبوو، پێشنیار دەکەین کە داوای یارمەتی لە پزیشکی دەروونناس بکەیت بۆ ئەوەی کۆتایی بە پەیوەندییەکی سۆزداری ژەهراوی بهێنیت.
- هەمیشە مەیلی ئەوەت هەیە بگەڕێیتەوە بۆ ڕۆتینی کۆن و خۆت بخەیتە ناو هەست و بیرکردنەوە ژەهراویەکان.
- نیشانەکانی خەمۆکی دوای جیابوونەوەت هەیە.
- بەردەوام مامەڵەکردن لەگەڵ ڕومانە دەروونییەکان و هەست و سۆزە نەرێنییەکان.
- بیر لە خۆکوشتن یان زیانگەیاندن بە خۆت دەکەیتەوە.
دوا وشە:
ئاگاداری خۆت بە بە ڕزگاربوون لە خۆشەویستی یەکلایەنە. لەوانەیە باوەڕت پێی نەبێت، بەڵام خۆشەویستی یەکلایەنە ئازاری هەردووکتان دەدات. عاشق بە بێ بایەخی خۆشەویست دڵتەنگ دەبێت، خۆشەویست هەست بە تاوان دەکات و هەست بە ناڕەحەتی دەکات بەهۆی بێ بایەخی عاشقەوە.
کەواتە ڕزگاربوون لە خۆشەویستی یەکلایەنە هەم بۆ سوودی خۆتە و هەم بۆ بەرژەوەندی هاوبەشەکەت. لە خۆشەویستی یەکلایەنەدا، ئەو کەسەی عاشقی هەیە، هێندە تێوەگلاوە لە هەستەکانی خۆیدا، هەست بەوە ناکات کە لایەنی بەرامبەر هەستێکی وای نییە.
لەم بابەتەدا ڕوونمان کردەوە کە بۆچی خۆشەویستی یەکلایەنە ڕوودەدات و چ زیانێکت پێدەگەیەنێت و چۆن دەبێت بەسەریدا زاڵ بیت. ئەگەر ئەزمونی واتان هەیە لە بەشی کۆمێنت بۆمان بڵاو بکەنەوە بۆ ئەوەی کەسانی تر سودمەند بن لە ئەزمونەکەت.
